पुणे महापालिकेतील 'टेंडर टक्केवारी' विरोधात आम आदमी पार्टी आक्रमक; सोमवारी करणार मूक आंदोलन**
**चास न्यूज लाइव्ह मराठी | पुणे**
पुणे महानगरपालिकेत सुरू असलेल्या कथित 'टेंडर टक्केवारी'च्या कारभारामुळे संताप व्यक्त केला जात असून, याविरोधात आता आम आदमी पार्टीने (AAP) आक्रमक पवित्रा घेतला आहे. या भ्रष्टाचारी प्रवृत्तीच्या निषेधार्थ 'आम आदमी पार्टी, पुणे शहर'च्या वतीने सोमवारी, २० एप्रिल रोजी सकाळी ११ वाजता पुणे महापालिकेच्या मुख्य इमारतीबाहेर 'मूक आंदोलन' करण्यात येणार आहे.
या आंदोलनाबाबत भूमिका मांडताना पक्षाच्या वतीने सांगण्यात आले की, महानगरपालिका ही काही धंदा करण्यासाठी नाही, तर ती पारदर्शक कारभारासाठी आहे. खुद्द देवेंद्र फडणवीस यांनीही 'महापालिकेत पारदर्शक कारभार करा' असे स्पष्टपणे म्हटले होते. त्यांच्याच विधानाचा आधार घेत, आम आदमी पार्टीने हा मुद्दा लावून धरला आहे.
महापालिकेत सुरू असलेली टक्केवारीची प्रथा बंद करून संबंधित वादग्रस्त पद त्वरित रद्द करण्यात यावे, ही आम आदमी पार्टीची मुख्य मागणी आहे. सोमवारी होणाऱ्या या आंदोलनात मोठ्या संख्येने पदाधिकारी आणि कार्यकर्ते सहभागी होऊन आपला निषेध नोंदवणार आहेत.
Post a Comment
0 Comments